തീയില്ല .

***********

പുകയാണ് മുഴുവൻ:

പുകയ് ക്കുള്ളിലു-

രുകുന്ന വേവുന്ന

തീയുടെ  വിറയാണ് മുഴുവൻ.

അലറുവാനാവാത്ത

കൺഠം ,പുറത്തേക്കു

ചൊരിയുവാനാകാത്ത രോഷം

തിളയ്ക്കുന്ന

പടരുവാനാകാത്ത വിങ്ങൽ

അതിനുള്ളിൽ

കരിയുവാനാവാത്ത നഷ്ടം .

ഒരു നാൾ തണുക്കും

മരവിച്ചു മഞ്ഞായുറയ്ക്കും

ഒടുവിലൊരിക്കലന്നൊന്നുമല്ലാതെ

നിലയ്ക്കും

അതുവരെ അകലത്തെ

കരകളെ നോക്കിയിരിക്കും

കടലുകൾ പോക്ക് വരവ് നടത്തും

പിരിയില്ല

പുക ക്കുഴൽ തേടില്ല

മുകളിലേക്കുയരുവാൻ

മഞ്ഞച്ച നാവുകൾ നീട്ടില്ല

കത്തിക്കരിക്കില്ല

പുറകിലെ കണ്ണുകൾ

ക്കെത്തി നോക്കാൻ

ഒന്നും ബാക്കിയും വെക്കില്ല.